ސަރުކާރުން ދަށަށް ދާނެކަމަށް ލަފާކުރި ޑޮލަރުގެ އަގު އަލުން އަނބުރާ މައްޗަށް

ފައިސާ ޗާޕް ކުރުން ހުއްޓާލުމުން، ދަށަށް ދާނެކަމަށް ސަރުކާރުން ލަފާކުރި ޑޮލަރުގެ އަގު އަލުން އަނބުރާ މައްޗަށް އަރަން ފަށައިފިއެވެ.

ދިވެހި ފައިސާގެ އަގު ހިފެހެއްޓި، ޑޮލަރުގެ ރޭޓް ތިރިވެ، އިގުތިސާދު ރަނގަޅުވަމުންދާ ކަމަށް މާރޗް 5 ވަނަ ދުވަހުގެ ރޭ ދ.މީދޫ ރައްޔިތުންނާ ބައްދަލު ކުރަށްވާ، ރައީސް ވިދާޅުވިއެވެ.

"އިރާދަކުރެއްވިއްޔާ އޭގެ (ފައިސާ ޗާޕްކުން ހުއްޓާލުމުގެ) ރަނގަޅު ނަތީޖާ ފެންނަމުންދަނީ. އަޅުގަނޑުމެންގެ ފައިސާގެ އަގު ރުފިޔާގެ އަގު ހިފެހެއްޓި އިރާދަކުރެއްވިއްޔާ ޑޮލަރުގެ ރޭޓް ތިރިވެ އިގުތިސާދު ރަނގަޅުވަމުންދާނީ. މިހާރު އޭގެ އަސަރު ފެނޭ އެބަ" ރައީސް މުއިއްޒު ވިދާޅުވި އެވެ.

ޑޮލަރުގެ ރޭޓް ދަށަށް ދާކަމަށް ރައީސް ވިދާޅުވި އިރު، ޑޮލަރުގެ ރޭޓް ކަޅު ބާޒާރުގައި ހުރީ 17.40 ރުފިޔާގައެވެ. ނަމަވެސް މިހާރު ޑޮލަރުގެ ރޭޓް ކަޅު ބާޒާރުގައި ހުރީ 18.10 ރުފިޔާގައެވެ.

ވީ ކިހިނެއް؟

އާއްމު ގޮތެއްގައި، ރާއްޖޭގެ ކަޅު ބާޒާރުގައި ޑޮލަރުގެ ރޭޓް ދަށަށް ދަނީ ރިސޯޓް ތަކުގެ "ހައި" ސީސަންގައެވެ. ސަބަބަކީ އެދުވަސްވަރު ރިސޯޓް ތަކުގެ ސާވިސް ޗާޖް މަތިވުމުގެ ސަބަބުން ކަޅު ބާޒާރުގައި ފަސޭހައިން ޑޮލަރު ލިބުމެވެ. ޑޮލަރުގެ ރޭޓް ދަށަށް ދާކަމަށް ރައީސް ވިދާޅުވީ މި ދުވަސްކޮޅުއެވެ. ނަމަވެސް "ލޯ" ސީސަންގައި ކަޅު ބާޒާރުގައި ޑޮލަރު ލިބުން ދަތިވެ، އަގު އުފުލެން ފެށީއެވެ.